fot. Morgan

Godajom, że poczontek nowego roku to nojlepszy czas na pozmiyniani czego w swoim życiu. Beztoż wiynkszość z nas godo, że łod nowego roku nie bydzie kurzić, nie bydzie tela maszkecić i sie chyci jakigo sportu.

Ni ma lekko

Z tymi łobietnicami to potym różnie bywo. Ciynżko tak z dnia na dziyń przestać jeść bombony, nie łapnyć cigarety jak przidzie fajrant w robocie abo stanyć godzina pryndzyj i iść se polotać, jak jeszcze nawet kury nie łotworzyły ślypi. Skuli tego wiynkszość z nas se dowo pokój i wszystko sie kulo tak, jak sie kulało przedtym.

Trza poleku

Jo se jednak myśla, że trza spróbować coś zmiynić, bo jak je sztyjc jednako, to sie człekowi mierznie. Nie trza od razu zmiyniać cołkigo życia, styknie zacznyć od czego małego, a reszta przidzie z czasym. Nie tak zarozki Rzym zbudowali. Nikiedy trza zacisnyć zymby, nikiedy sie chce to wszystko ciepnyć w pierony, ale jo wom godom, że na koniec bydziecie z siebie festelnie zadowolyni.

Powiy wto, że kto sie kurom urodził, orłym nie zdechnie, abo że z lacza papucza nie zrobisz. Zawsze sie idzie jako wykryncić, pedzieć, że sie mo słabo wola. Tuż nic na siła – jak nie chcesz nic zmiyniać, to dej se zarozki pokój i se nawet nie łobiecuj, jak nie chcesz ani spróbować. Jak jednak chcesz, to dom ci pora wskazówek.

Trza mieć knif

1.  Nie próbuj wytrzimać cołkigo roku (abo cołkigo życio!) bez szekulady. Spróbuj wytrzimać 30 dni. Po tych 30 dniach spróbuj wytrzimać nostympne 30 dni. Bydziesz widzieć, już ci bydzie łatwij.
2. Jak żeś se pedzioł, że od piyrszego stycznia nie kurzysz, a drugigo żeś zakurzył, to trudno. Zdarzyć sie moge kożdymu. Zacznij na nowo od trzecigo.
3. Nie wszystko naroz. Jak chcesz sie nauczyć szusować na nartach, to nie ciś sie łod razu tyż na ekstremalno jazda na kole i kurs sztrykowanio. Nie bydziesz mieć czasu na to, żeby to wszystko pochytać. Zacznij od jednej rzeczy, a jak już ci to jako pódzie, to pomyśl ło nastympnej.
4. Nie porównuj swoich poczontków do czyjigoś środka. Jak przidziesz na siłownia, to nie bydziesz mieć po tydniu takich muskli jak chop, co tam ćwiczy trzi lata. Dej tymu czas.
5. Wymyśl se taki postanowiyni, kierego na pewno dotrzimiesz. Jak nie lubisz jeść krupnioków to se postanów, że nie bydziesz jeść krupnioków. Wtedy mosz pewność, że na pewno ci sie to udo.