fot. Ariel H.

Na zicher słyszeliście już, że terozki durch robiom larmo w Katowicach. Roz Off Festiwal, roz Tauron Nowa Muzyka i tyż inksze fajery. Przi taki mocce uciechy je tyż mocka norodu. Prziłarzom i przijyżdżajom roztomajte zorty ludzi. Dzisioj my narychtowali i opisali tych, kerzi tańcujom, tompiom i larmujom pospołu z muzykantami, czyli wszyskich przocieli muzyki. A sie niy gorszcie, kiej sie łokoże, że tukyj je co ło Wos i niy za piyknie naszkryflane. Weźcie se to poleku, pra.

Fiuchaty, kolorowy szmaterlok

To je ta zorta, kero loto fraj, wszyndzie kaj przidzie to rozdowo kusiki, i kwiotki. Takich hipisow już łostało mało, ale piyrwy było wiyncy takich zarośniyntych ludzi, kerzi łazili w łokrongłych zonynbrylach i mieli wszyndy kolorowe szmukcojgi.

Przociel wszyskich nałokoło

To som ci, co majom wosy trocha jak nudle, posfijane i dugie, łoblykajom sie w trzi barwy (żołto, zielono, czyrwono) i durch sie śmiejom choby gupi do syra. To som rastamanie, kerzi suchajom reggae.

Zmaraszony i potargany

Niykerzi godajom, że to som chachory, beztoż, że majom byle jaki łachy i cołki dziyń poradzom przebimbać na borsztajnie. Prowda jest tako, że łoni żodnymu niy zrobiom sromoty, żyjom se przed sia i smolom wszysko. Jak sie jich niy szteruje, to tyż żodnymu niy bydom zawodzać. Rozchodzi sie ło punki.

Czorno łobleczony wiking

Już na pewno żeście spokopili, że łazi tukej ło metala. Tak sie godo na tych, kerzi majom duge wosiska, brody do samego basa, łażom na czorno, choby wylyźli z gruby, strzewiki majom srogie i ciyżki, na karku rube kety, a tak richtig to majom blank miynki syrca.

Tańcuje choby go sztrom pokopoł

To je tyn, co mo rod techno. Idzie go łobejrzeć łobleczonego we nylonowe łachy ze trzema sztrichami. Durch kiwie gowom do przodku i do zadku, choby go wto zaczarowoł, bo durch sucho ty muzyki. W gowie mo larmo, choby mu wto tam fedrowoł.

Synek z krokiym do klina

Czyli inakszyj skate. To je taki zort ludzi, kerzi łażom w szyldowach, bluzach wielkich jak kalfas i w galotach z krokiym do klina. Jak jakoś oma trefi na drodze takigo synka, to pado „Pieronie, dyć łon już downo niy śmiy robić w galoty!”. Take ludzie suchajom nojczyńści hip-hopu, abo jak to niywtorzi nazywajom – rapu. Czasym se idzie tego posuchać pospołu śnimi, w banie abo busie, czy sie chce, czy niy.

Osiedlowy lajermann

Kaj sie czowiek niy łobroci, to terozki leci disco. Jak je disco, to som i ci, kerym łone podłazi nojbarzi. To som tacy, kerzi radzi słuchajom radiowych szlagrow. Nojlepi jak to je takie ślonskie radio, kere sie puszczo na fol na zegrodce, ze kamratami. Dobrze coby go słyszoł cołki familok, a nojlepi, kiejby kożdy jeszcze umioł śpiywać, co tam puszczajom.

No ale ja, kożdy woli co inkszego i idzie sie wadzić durch co lepsze, beztoż łostawiomy już w spokoju wszyskich przocieli muzyki i niech se suchajom co wolom. A Wy kierożeście som zorta?