Kachlok - Kultura - gryfnie

Kachlok

fot. Ken Owen
fot. Ken Owe

 

Kożdy w doma chce mieć gryfnie. Beztóż sprawiomy se roztomajte nowomodne klamorstwo. Szranki, wyra, ekologiczne piece, agd co to ponoć mało sztromu żere i kiere zaroz jak sie kończy gwarancjo, trzeja wyciepać na hasiok. I tak tyż robiymy jak dejmy na to erbnymy jako izba bo babce, kiero sie pominie. Se godomy ta ryczka już je niymodno, lepij se sprawić jaki szwecki dizajnerski cacko, abo tyn kachlok to ino plac biere i niy pasuje do tyj plaskatyj OSB łoklejonyj papynydlekym. A to je łogromny fyjler. I wto mo jeszcze taki kachlok w doma i chce go wyciepać, niych sie z tym wstrzimie i posłucho tego.

Gorko choby cie wto łogłapił

Po piyrsze i nojważniyjsze, takigo ciepła jaki dowo kachlok niy do Ci żodyn inkszy kominek ani tyn z płaszczym wodnym ani bez płaszcza. Bo jak sie napoli w kachloku to robi sie tak piyknie, tak choby sie wziyno jakigo fajnego chopa abo baba ku sia i fest łogłapiło. Wiycie ło czym godom, pra?

Funguje jak ni ma sztromu

Po drugi jak robiom co ze sztromym abo z gazym, to żodyn piec niy funguje i w doma trzeja sie nałoblykać fest. A jak wto mo małe bajtle to dziepiyro je łostuda. Trza jich brać zaroz do swigrów na nocka, coby rymy niy chyciły abo niy zaczły kucać.

Po toniu

I po trzeci jak sie dobrze nahajcuje w takim kachloku, to to ciepło sie poradzi długo trzimać. Niy trzeja lotać i zaś tak czynsto gynsto dokłodać, jak to niywtorzy wygodni se ształnujom. Toż je tyż toni, bo niy trza do niego tela wonglo. Ino trza sie trocha nalotać z kołkastlom, ale w dzisiyjszych czasach, to sie kożdymu przido, trocha fetu ściepać.

Gryfnie w izbie

Po czworte, jak mocie jeszcze kachlok, to Wom bydom zowiścić wszyjscy Ci kierzy go ni majom. Ty piykne kachle w roztomajte łobrozki. Na jednych kwiotki na inkszych ludzie, kierzy co robiom. Jedne kachle ciymnozielone, żółte i jeszcze inksze. Takigo dizajnu Wom niy złonaczy nawet nojlepszy architekt, pra.

Toż jak mocie taki skarb w doma a mocie strach samymu dać mu cug to weźcie se nojprzód fachmana, co Wom go podłonczy a nojprzód kominiorza coby Wom połoglondo, cobyście sie za gibko niy trefili ze starkom. A jak już to bydziecie mieć porychtowane wszyjstko, wypucowane nachajcowane, jak sto pieronów. To se zawrzicie łod niego dźwiyrki, zakryncicie śrałba i przez cołko noc tyn kachlok bydzie Wom pluł goroncym na cołko izba. A Wy bydziecie sie mieć jak u Ponbóczka.

  • 22.11.2015

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.