Jak kupować gyszynki? - Kultura - gryfnie

Jak kupować gyszynki?

fot. Silvia Sala
fot. Silvia Sala

Przichodzom taki chwile, że trza se zadać jakiś trudne pytani: Jaki je syns życio? Co było piyrsze – jajko abo kura? Czamu Noe wziyn kopruchy na arka? I co dać na gyszynk? Na piyrsze trzi nie umiymy Wom łopdowiedzieć, ale przi tym ostatnim mogymy Wom trocha pomóc. Kupowani gyszynku niy musi być sromotom.

Gyszynki rod dostowo kożdy – mody, stary, chop i baba. Niy znom żodnego, wto by sie nie cieszył, jak mu kery co do. A już nojbardzij som my radzi z takich gyszynków, kere chcieli my dostać. Zaś tyn, co dowo, je fest uradowany, jak widzi, że sie łobdarowanymu gymba śmieje. Co zrobić, żeby zawdy trefić z gyszynkiym?

Mynij godej, wiyncyj słuchej

Kiej wiysz, że niydugo mosz komu kupić gyszynk, to dej fest pozór na to, co tyn ci godo. Nikiedy przi klachaniu sie trefi, że wto powiy „Jerona, ale jo widziała gryfno taszka!” abo „Kule, kiebych mioł taki majzel to  sie gipsdeka sama oklupie”. Mogesz tyż pogodać z kim z familie, coby ci pedzieli, czy wto ło czym nie marzy kaj po nocach.

Nie kupuj podle siebie

Nikierzy to jak co inkszym kupujom, to tak choby po sia zaglondali. Widzom dejmy na to giskana i kupiom, bo dyć sami majom zegroda i by sie z takij giskany radowali. A potym dostanie to wto, co z zieleniny mo yno pietruszka do nudelzupy na niedziela i zostowo taki borok z tom giskanom, co mu dwadzieścia lot w pywnicy leży i kurz chyto.

Niy na ostatni driker

Ci, co zowdy na wszystko majom czas i nigdy im sie nie śpiycho, majom chyba nojbardzij popapane. Spomni sie takimu dziyń przed geburstagiym abo Godami, że dyć łon gyszynku nie kupiył, i potym drałuje na łostatni momynt a szuko czego choby wancki psa. Człowiek potym cołki znerwowany, bo czasu ni ma i kupuje bele co.

Nie bydź szpyndlikorzym

Nie godo żodyn, że mosz pół wypłaty wydać na gyszynk, bo to by cza było fest gupim być, żeby tak zrobić. Ale jak mosz komu kupić gyszynk za 5 abo 10 złotych, chocioż byś mogł wydać wiyncyj, to dej se pokój. Siebie gańby nie narobisz a komuś przikrości. Już lepszy nic nie kupuj i powiydz, że ni mogesz prziś.

Jednym geld, inkszym zista

Som tacy ludzie, kierzy wolom na gyburstag abo inksze świynto dostać trocha geldu w kopercie. Wtynczas mogom se uzbiyrać trocha piniyndzy na jako szumno rajza abo strzybnego moplika. Ni ma w tym nic złego, i jak Ci wto powiy, żebyś niczego nie kupowoł, to mogesz wrazić trocha rubych do koperty, a kupić yno  ku tymu szekulada. Inksi zaś fest lubiom, jak sie im samymu co zrychtuje, łod dżymu z wieprzków po usztrykowano mycka. Taki gyszynk, chocioż kosztuje niyroz mynij piniyndzy niż kupny, ło wiela wiynkszo mo wartość, bo sie poświynciyło swój czas i chynci. Jak jeszcze mosz grajfka do czego to durch fajnie – wszyscy bydom radzi.

  • 06.12.2015

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.