Fot. SayLuiiiis

Jak żeście sie kapli, choćby po chycach jaki zaczynajom sie loć z nieba, feryje sie zaczły!. Żeby łone były fest udane, to trza se porozważować, co wciepnyć do tasze, żeby potym sie niy gorszyć. Kożdy z Wos chyba wiy co mu potrzebne, ale przipomnieć se niy zawadzo. No toż łod czego zacznymy?

Zonynbryle, deka i zesle

Zonynbryle, czopka (nojlepij z daszkiym) i jakiś krymy na skora, żeby klara, kero bez lato świyci prosto na dekel, nie sprawiyła tak, że zaroz bydymy wyglondali jak Indianery abo raki we wrawej wodzie.

Jak pojadymy kajsik nad woda to trza na czymś se legnyć. No toż bierymy deka i jaki zesle. Nojlepi sprawdzo sie ligynsztul, bo pukel niy ciyrpi, a i idzie „na łoko po grilu ciepnyć” tak, coby niy stanyć potym cały połomany.

Fukadło na kopruchy, pachnidła, dmuchane krokodile

Jak już my som nad tom wodom, dejmy na to słodkom, to trza pamiyntać o jakim fukadle na kopruchy. Jak go niy weznymy, to bydymy przi fojerze siedzieć we golfach i galotach, a i tak nas bydom bajsać po pyskach. Som tyż roztomańte pachnidła, kere se zapolo i tyn dym mo dować nom łochrona przed tymi małymi pieronami. Wszysko po to, by niy być łopuchnytym  po taki wojnie jak bania za hajźlym.

Do szpilanio we wodzie przidajom sie madrace, dmuchane krokodile, pufki na rynce i inne klamoty.

Szkarboły, flaszka wody, mobilniok

Jak zaś kery lubi deptać po gorach, ni może zapomnyć o porzondnych szkarbołach, takich za kostka, bo jak niy, to se idzie szłapa po piyrszym kilometrze skryncić. Trza mieć tyż mocny rugzak, do kerego wlezie flaszka wody, jaki szamani i coś na przeblyczka, bo pogoda sie lubi w gorach pieronym pryndko miynić. Tak samo pamiyntejcie o naładowanym mobilnioku, bo jakby praje tak..tfu tfu.. wola niy godać.

Takich roztomańtych dinksów, wiynkszych abo myńszych je cały miech. Trza o nich pamiyntać przi pakowaniu. Je taki jedyn, kery nic niy woży ani niy kosztuje, ale kerego ni możecie zapomnieć. To je dobry humor i uśmiych. Bez tego żodne wypoczywani w górach abo nad wodom nie bydzie udane. Pamiyntejcie ło tym!