fot. Bartek Wyrobek

Latoś zimy sie żodyn nie spodziywoł. Ani drogowcy, ani kierowcy, ani nawet bajtle se nie forsztelowały, coby na feryje miały śniyg. Ale śniyg spod i to fest dużo go spadło, zrobiyło sie zima, bioło i kylzowka. Terozki jak sie idzie drogom, to chyba nojczyńścij sie słyszy “Pieronie, ale zima!” Tyż sie ni ma co dziwować, bo przez łostatni pora lot śniegu i mrozu było tela, co kot napłakoł. Beztoż sie wszyscy łodzwyczajyli od takij rychtyk zimy.

Spodnioki i mantle

Downij tak nie było. Downij kożdo zima była bioło i tyż doś srogo. W szranku sie na zima trzimało wełniane mantle, kożuchy, spodnioki i ruski walonki, a nie tam jaki ciyńki jak szlistki jakle, co to terozki idzie kupić w gyszeftach. Jak sie cisło do szkoły abo roboty, to trza było wylyź z chałpy godzina pryndzyj, coby donść, bo nieroz taki były zumiynta, że ani nie było widać, kaj je lojfer. Drałowali ludziska przez tyń śniyg, bo nie było downij tych pługów, co to nom go dzisiej zgarniajom sprzed kichawy.

Szlincuchy pod parza

Kożdy terozki ciśnie yno tam, kaj musi, a nojlepszy wszyndzi autym jedzie, coby go mroz po kitach nie szczypoł. Po robocie zaro wszyscy jadom du dom, coby sie łogrzoć pod dekom abo pierzinom przi szolce tyju. A dyć jak już momy tako ganc bioło zima, to czamu by tyż z tego nie skorzystać?

Idzie dycko iś na szlincuchy abo pojechać do Wisły, abo Szczyrku poszusować trocha na nartach. Nawdycho sie człowiek świyżego luftu, dychnie se trocha i jeszcze sie poruszo. Same zdrowi!

Garniec na łep

Idzie z bajtlami ulepić bołwana abo pociepać sie śniyżkami. Wiela to je uciechy łoblyc takimu bołwanowi garniec na łep i zrobić kichol z marekwie, to wiy yno tyn, kto już to robiył! A śmiychu wiela przi tymu! A nojlepszy je potym prziś du dom, odtajeć przi ciepłej zupie i czym gorkim do picio. Ci, co już majom łosiymnoście, to se mogom nawet grzańca wyduldać.

Godajom, że taki srogi zimy to już coroz rzodzij u nas bydom, że klimat sie łocieplo i to beztoż. Tym bardzij trza sie fest ciepło łoblyc, łobabulać szalym, wsadzić mycka na łeb, glazyjki na rynce i ciś na dwór pokulać sie trocha w tym biołym puchu!