fot. Adam Lerner

Same sie niy zrobi

Świat, kery widzymy we telewizorze, internecie, kery oglondomy w gazetach je kolorowy, wyonaczony i fest ku nimu ciongnie. No bo kery by nie kcioł być bogaty, mieć fajne auto, zaparkowane przi jaki willi? Kery by nie chcioł leżeć do gory basym na Malediwach abo innych Bora Bora? Yno, żeby to mieć, trza sie piyrsze pieronym napocić. Wyuczyć, nasztudyrować i to ni na jednej sztrece. Tak przinajmi nom se zdowo. Tak nom to do gowy naładowali. No to wszyscy sztartujom po średnij szkole na przisłowiowe logistyki, marketingi, ruszajom na zarządzani. Praje żodyn se niy wyobrażo, żeby iś na nauka jakigo fachu. To jeszcze pora lot tymu było passe. Całe szczyńści, że se to pomału zmienio.

Papiory to niy wszyjstko

Mieć dobry fach w gorści zaczyno zaś być zocne. Bez tego sie łod młodości nie świngniesz. Ja, bydziesz mieć papiory, szkoły, fakultety, yno roboty mieć niy bydziesz. Dyplomow do garca niy wsadzisz i nie uwarzysz. Wtedy zacznie se chytani kożdej łokazji. Wtedy bydziesz deptoł po fechtach. Być fechciorzym, to ni ma nic gańbliwego i tyż ni ma co wybrzidzać. Żeby żyć trza robić. Bydziesz sie po tym marketingu z logistykom abo innom politologiom chytoł wszystkigo czego idzie. Yno, że taki fechty poczucio stabilności ci nie dajom.

Stolorz, kominiorz a możno blachorz?

Trza se rozwożić czy ni poszukać inkszego knifu na życi. Życi fachmana. Stolorz, ślusorz, kuchorz, blachorz, kominiorz to złe fachy? No jasne, że ni. Możecie se chycić frizerowanio abo tyż spawanio. Tam tyż idzie zarobić dobry gelt. Szewcow tyż już bardzo ni ma za wiela. A wiycie wiela biere malyrz za meter pomalowanio abo tapetowanio? Wcale ni mało. Takich fachow je w pierony!. A jak już Wom żodyn nie spasuje zawsze możecie iś za farorza abo panna klosztorno. To tera był szpas. Myśla, że sie żodyn wielebny abo siostrziczka nie łobrazi.

Trza być nojlepszym 

Yno żeby było jasne, jo Was nie namiawiom żeby se nie uczyć abo żebyście ni mieli ambicje. Yno żeby być do przikładu dobrym stolorzym tyż trza wiela umieć i mieć pierzinsko ambicjo. Pasjo trza mieć wszyndzi. Czy sie stoi w kuchni przi blasze czy jako rechtor użyro z dzieckami przi tablicy. Prastarzik, kery już poszoł do nieba zawsze godoł tak: Ja, wszyjscy by kcieli rzondzić innymi, a nic w życiu same se niy zrobi. Toż wiycie… porozwożujcie deczko nad tym.