Klamory - drugi życi rzeczy - Kultura - gryfnie

Klamory – drugi życi rzeczy

fot. Lucas Cobb
fot. Lucas Cobb

Ludziska kupujom, wiela wlezie wszystkigo. Kożdy chce mieć sztyjc co nowego, bo nom w tych wszystkich reklamach cisnom kity, że my tego wszystkigo potrzebujymy. Guzik prowda.

Co oma miała w doma

Nikiedy to by trza było mono pogodać z omom i łobejrzeć, wiela za ji czasów ludzie mieli klamorów. O wiela mynij niż terozki, a dycko wszyjscy żyli. Wiyncyj tyż se ludzie pomogali, bo jak yno kto jedyn we wsi mioł koło, to somsiady przichodziyły te koło pożyczać, a też sami pożyczyli co innego, jak mieli. I ludzie dowali pozor, żeby nie rozlajerować cudzego koła. Mało sie miało, fest sie szanowało.

Jo nie godom, że wszyscy  majom tera być ascetami, lodówkom rzaznyć bez łokno, geltym ciepać w ludzi na chodniku, a telewizor chodzić łoglondać do somsiada. Jo by yno chciała pedzieć, że tak rychtyk do szczynścio trza nom mynij rzeczy, a wiyncyj ludzi.

Nim pódymy do gyszeftu wydać cołki bajtlik, lepij sie pomyśleć, czy nom tego naprowda trza. A jak już trza, to dobrze najpiyrw sprawdzić, czy już tego ni momy w doma.

Stare je zocne

Wiela to idzie starych klamorów znejść na górce, to wiy yno tyn, co mo górka w chałupie. Roztomańte rupiecie tam som! Stare kołkastle, klajdy po starce, byfyje, asjetki, bigelbrety i co jeszcze. Wiela to je we wercie, to nikiedy nie idzie pedzieć. Jedne graty to sie yno nadowajom do wyciepnycio, bo już som downo zaruściałe abo nie fungujom, ale nikiedy idzie tam trefić rychtyk gryfne rzeczy, no i jeszcze ganc dobre!

Jak sie przi jakij biesiadzie narychtuje jedzyni na talyrzach po starce, to idzie pierzińsko szponcić przed kamratami. Bo taki talyrz nie dość, że piykny, to jeszcze mo swoja historyjo. I ta historyjo idzie pedzieć komu, coby tyż pamiynć o życiu przodków żyła.

Abo jak sie znejdzie jaki stary klajd, to sie dycki idzie nim asić. Żodno baba nie bydzie takigo miała. Żodno.

Antyki za złotek piontka

Jak ni mosz takich pamiontek po starce, a ci żol, to ciś na jaki pchli torg, tam ludzie wyprzedowajom graty po swoich starkach. Na takim torgu to sie idzie fest obkupić w roztomańte sprzynty. Ty se co kupisz szwarnego, oni zarobiom, i wszyscy bydom uradowani.

Drugi życi rzeczy to je fest dobro rzecz. Oszczyndzo nasze piniondze, oszczyndzo naszo planeta i tyż trocha przipomino, że nie trza mieć wszystkigo, co nom pokazujom w reklamach.

  • 16.11.2014

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.