fot. Iwona Łach

Bez farbowanych jajec ni ma Wielkij Nocy. Łod niepamiyntnych czasów dowo sie jich do koszyczka ze świynconkom. Chocioż terozki sie jich nojczynścij farbuje gotowymi barwnikami, downij robiyło sie to troszka inakszyj.

Nojlepsze biołe jajca

Ciepało sie te jajca do wody po warzonych szupach z cebuli, tyju, modrej kapusty abo szpinaku. Tak pofarbowane jajca łozdabiało sie potym na roztomańte sposoby. Na jednych sie szkrobało wzorki, inne malowało woskiym, jeszcze inkszym prziklejało sie liście z pietruszki i zawijało w rajtuza. Nojlepsze do farbowanio som biołe jajca, kiere som znoszone bez czorne kury. Szukejcie gospodorza, kiery mo taki ptoki na placu. Jak wto mioł ku tymu richtyk grajfka, to wychodziyło mu nieroz małe dzieło sztuki. Kiej chcesz mieć szumne jajca w tym roku, poczytej se, jako sie to idzie zrobić.

Kroszonki

Kroszonki to jajca, kere po uwarzyniu i pofarbowaniu szkrobało sie jakom jegłom, szpyndlikiym abo ostrymi nożyczkami. Trza se dać pozór, coby nie naciskać tego za fest, bo szupka popynko i psinco nam z tego wyndzie. Idzie szkrobać kwiotki, kropki, trójkonty abo co tam se kto wyforszteluje.

Jajca malowane woskiym

Nojpiyrw trza uwarzone jajco na chwila odstawić, coby ochłodło. Jak jajco bydzie za ciepłe, to wosk sie bydzie za fest topiył i to moge potym szpetnie wyglondać. Jak już te jajco je na tela zimne, że idzie je utrzimać w rynce, to łomie sie świyczka na konski i roztapio w kochliku na piecu. Potym biere sie jaki szpyndlik z wielkom łepkom i nakłodo wosk na jajco. Robi sie tako kuleczka, kiero idzie zostawić (wtynczas bydom kropki), abo pociongnyć to trocha i zrobić szmaja. Idzie se tym malować, mono nawet co napisać. Jak tyn wosk ochłodnie i zrobi sie twardszy, to sie ciepie jajco do farbki. Tam, kaj je wosk, jajco zostanie jasne, beztóż jak sie potym tyn wosk zeszkrobie, to bydymy mieć piykno pisanka.

Jajca ze wzorym liścia

Na uwarzone jajco przikłodo sie liście z pietruszki (abo jaki inksze liście, ale terozki to chyba żodnych nie dostaniecie). Te liście trza najprzód prziklackać do szupki, coby sie do tego jajca lekko prziklejyło. Potym sie to obwionzuje jakom starom rajtuzom abo gazom, zawionzuje wynzełki po obu stronach, coby sie to trzimało, i wsadzo sie te jajco do barwnika. Po wyciongyciu syjmuje sie ta rajtuza, potym syjmuje sie liść z pietruszki i już to je gotowe. Coby jajca sie bardzij błyszczały, szmaruje sie je jakim fetym, nojlepszy olejym.