fot. Harold Navarro

Wiela na świecie je babów tela je roztomajtych tasz. A w kożdej je co inkszego!  
Spytalimy sie naszych kamratów,  jak to je u nich. Nojbarzyj radzi momy ty dwie łodpowiedzi (te dwie osoby dostajom łod nos babski tasze). 

Downo, blank downo tymu, jak żech jeszcze była małym gizdym, muter i oma godały mi: „ino niy sznupej mi w taszce”. Cołki czos żech miarkowała, po jakiymu gynał taszy niy moga chytać- dyć jest tela roztomajtych klamotow, kere bajtel może zgiździć! Potym dostałach piyrwszo taszka- jak żech szła do komunii, ale miałach tam ino ksionżeczka, różaniec i taszyntuch. Durś żech spominała co mi godały mama z omom. Warci żech sie dowiedziała ło co idzie, niż mi sie zdowało. Terozki, kej mom 23 lata, wszysko wiym. Pedzieć Wom ło co w tym łazi? Wcale niy ło to, że tam jest taki bajzel, że sie idzie potracić, ani ło to, że som tam roztomajte bambetle. Łazi ło to, że kożdo baba musi sie doczekać swoi tasi. Jak już jom mo, znaczy, że je na tela staro, że mo na gowie roztomajte problymy. I jak sie z bajtla robi frela, a z freli mamulka i oma, to wszysko to widać po tym, co mo w tasi. Nojprzod maszkyty i pora kotlokow, potym piyrwsze żadeło i lipynsztift. Potym zdjyncie szaca i hefty. Dali wszysko, co poczebujom bajtle i to, czego chop niy zmieści w kapsi (graczki, taszyntuchy, portmanyje i inksze). I tak idzie dugo godać, jak dugo idzie szukać mobilnioka w babski taśce. Idzie pedzieć, że baba mo we taśce cołkie swoje życie! Baby wiedzom, ło czym godom, a chopy niech się miarkujom- niy sznupcie w babskich tasiach!
/ Pani Is Ka /

Jo je baba. W moi taszy smyca: bajtlik, lipynsztift, fajla do pazurow, żadołko, grzebyń, taszyntuch, bryle, mobilniok, bombony na fajny chuch, casami jakeś kyksy, wszystkie papiory w brifce, legitka, dowod, bilety na bana,tuśki do malowanio ślypi, kluce do zomka do chałpy, fotografijo chopecka i cery, kopalnioki na kucanie, taszynlampa jak mie cimok dopadnie, mały parfin coby gryfnie woniać i sztift pod parze coby sie nie pocić. A tasza mom na hynglach i na rajszweszlus coby jakiś rojber mi nic nie drapnoł.
/ Pani Krystyna /

A co jeszcze inkszego może być w babskij taszy? Jak niy wiycie, poczytejcie dalij:

Trzi rodzaje klamorów: swoje, łod dziecek i łod chopa.
/ Pani Ewelina /

Harpancie!!!!!! i jeszcze roz Harpancie!!!! a w tym harpanciu wszistko sie moze przidac!!!! Roz na miesionc, jak w taszce zaczyno łokropnie czuć, to baba wysypuje wszistkie harpancie na stól i sie je pomalutku, pomalutku łoglondo i godo, ze kupa rzecow wyciepnie i potem tak dalyj pomalutku łoglondo, łoglondo i pomalutku wciepuje wszistko nazod do taszy, aż zaś cale harpancie je gryfnie pouklodane w taszce.
/ Pani Beate /

Bajtlik w połowie prozny, lipynsztifty ze czi, bryle bo łostatnio fest klara blynduje, myjtermas – jakbych miała komu co zmierzić, świynty łobrozek z Maryjkom boch jest z Piekor, kluce do dom, kluce do auta, kluce do krzinki na brify, sznuptychle na jedyn roz, tablytka na ból gowy, kałgomy i amoloki, zicherka jakby mi lajbik pościł, no i oczywiście taszlampa co bych mogła co po cimoku z ty tasi wygrzebać.
/ Pani Monika /

Po prowdzie to, niy idzie pedzieć, czego baba w taszy ni mo.
/ Pani Agni /

Żodyn nie wie, co mo w taszy. Łona tyż niy wiy.
/ Pani Kasia /

Fest nawet Pan Bócek nie wiy co łona mo w tasi.
/ Pan Radek /

Ale nojważniyjsze z tego wszyjstkigo je to:

Baba mo w taszy sprzątać!
/ Pan Marek /

I szlus ;)