Szałot - Warzyni - gryfnie

Szałot

fot. Iwona Łach
fot. Iwona Łach

Jak Ci wto powiy na Ślonsku, że by zjod szałot, to sie go nojprzód spytej ło co mu sie rozchodzi. Bo po piyrsze szałot to je inaczyj sałata tako zielono co rośnie we zogrodzie a po drugi, to je tako sałatka ino że z kartofli i inkszych gymizów. I mie łazi ło ta drugo.

Co je w nij takigo mmmmm? Po piyrsze idzie jom jeść samom, bez żodnego miysa abo ryby i dobrze bydzie smakować, ale lepij smakuje jak tyn konsek tego kotleta abo dorsza je na talyrzu, wiadomo.

Prziszła łona do nos z Niymiec i w oryginale mianuje sie Kartoffelsalat. I jak to je z wszyjskim idzie jom robić na wiela sposobów. I warzić bez cołki tydziyń jak i na łodpust. Pamiyntom, jak moja starka rychtowała jom na kożdy łodpust i ino sie wlazło do siyni, a już jom było czuć.

Co nom bydzie trza do szałotu?

  • kartofle – 500 g
  • łogórki kiszone – ze 5 szt.
  • korzyń pietruszki – 3 szt.
  • marekwia – 5 szt.
  • korzyń selera – 1 szt.
  • cebula – 1 szt.
  • majonez – 3 łyżki
  • mostrich – 1 łyżka
  • sól, pieprz
fot. Iwona Łach

Jak to sie robi?

  1.  Kartofle trzeja tak uwarzić, coby ani niy były za twarde, bo sie bydzie źle jich kroć ani niy za miynki, bo sie zrobi ciaplyta. I jak sie już uwarzom to pokroć jich w tako fajno rowno kostka. Im myjszo, tym lepszo. Som tacy, co warzom kartofle całe, niy szkrobiom jich ino nojprzód dobrze umyjom. Tak tyż idzie.
  2. Wzioś jak nojwiynkszo miska i wciepnyć do nij ty wszyjstki pokrone gymizy – cebula i łogórek tyż w kostka. I teroz nojważniyszo rzecz. Zrobić tako zajzojera.
  3.  Majonez wymiyszać z mostrichym i do tego kapka soli i pieprzu cyknyć. I teroz fest poleku i z wyczuciym to miyszać, coby sie niy zrobiła ciaplyta. Zamiast majonezu i mostrichu idzie dać szkwarki. A tako wersja fit, to idzie zrychtować z jogurtym naturalnym.
  4. Idzie tyż jeszcze dociepnyć jajco uwarzone na twardo, majs, rukola, sznitloch, radiski. Tak naprowda co sie Wom nawinie.
  5.  Łona lepij przyńdzie i bydzie szmakować jak sie jom wrazi na pora godzin do lodówki. Czasym sie z tym niy zdonży bo pryndzyj wtoś przidzie z dworu i jom zjy. Fajne je w nij to, że idzie jom zrobić se pryndzyj i jak weźnie Wos głód to zawdy wyciongnyć i wszamać! Ino trzeja se dać pozór, że jak sie dowo do nij majonez, to łona niy może za dugo siedzieć we lodówie, bo może skwaśnieć. Toż możno lepij ty szkwarki :)
fot. Iwona Łach
fot. Iwona Łach
fot. Iwona Łach
fot. Iwona Łach
  • 18.02.2017

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.