Smażonka ze szpyrkami - Warzyni - gryfnie

Smażonka ze szpyrkami

fot. Radosław Kaźmierczak
fot. Radosław Kaźmierczak


Godajom że śniodani to nojważniyjszy jodło dnia, bez kierego niy ma siły do roboty i inkszych rzeczy… i majom recht! Co je nojlepsze coby trzimać  człowieka bez cołki dziyń? Smażonka ze szpyrkami ze ciepniyntym na wiyrch sznitlochem!

Co nom bydzie trza?

  • 4 jajca
  • 5 dkg szpeku (słonina) abo wyndzonki
  • cebula
  • sznitloch (szczypiorek)
  • sól
kuchnia_18-09-2017_foto_rk (1)
fot. Radosław Kaźmierczak


Jak to sie robi?

  1. Szpek pokroć na jak nojmyjsze konski i zeskworzić ale niy za długo, coby sie niy przychycił.
  2.  Cebula tyż pokroć jak nojciynij i dociepać do tych szpyrek.
  3.  Jajca trzasnyć ło kanta, powoniać, czy som dobre, wciepać do jakij asjetki abo szolki. Pofyrlać widełkom, coby biołko sie połonczyło z żółtkiym. Bo jak to zrobicie rzadnie, to bydziecie mieć łosobno biołko a łosobno żółtko, a to niy za piyknie wyglondo.
  4.  Jajca wloć do tego miszongu szpyrki z cebulom. I polekutku miyszać, coby jajca sie zetły, ale tyż coby sie to fajnie zmiyszało pospołu. I teroz tukyj dejcie pozór jaki wto mo kust bo jedyn woli, coby jajca były zesmożone tak, że jak sie wrazi widełka, to łona by poradziła stoć, a inkszy, coby biołtko sie niy ściyno za fest. Jo godom, że nojlepij tako wersja pojszczodku.
  5.  Na koniec jeszcze posolić smażonka i ciepnyć pokrony sznitloch.
  6. I idzie wszamać!
  7.  Idzie se jeszcze zrobić tako wersja fit, kaj bydzie mynij tych kc. Toż zamiast szpeku abo wyndzonki zeskworzić szinka z pultoka
  8.  Tak ekstra bydzie tyż dociepać świyże prawoki, maśloki abo zajynczoki.
fot. Radosław Kaźmierczak
fot. Radosław Kaźmierczak


Ty maszkety, kiere tukyj momy pokozane na łobrozkach, uwarziło dlo nos Pole do popisu. To je katowicko ekstra kuchnia w kierej nauczom Cie warzić tak, że żodyn Ci niy powiy że mu niy smakuje a ino bydzie jod aż mu sie bydom uszy trzyńść. Zapraszomy na http://poledopopisu.pl

  • 09.01.2018

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.