Nudelzupa - Warzyni - gryfnie

Nudelzupa

fot. Iwona Łach
fot. Iwona Łach

Nudelzupa

Ni ma na Ślonsku niedziylnego łobiadu bez nudelzupy. Kożdy jom robi po swojimu, kożdo smakuje deczko inaczyj, ale nojwożniejsze, że je w niedziela na stole. Jo wom podom przepis na niedzielno nudelzupa od mojigo fatra.

Co nom bydzie trza do zupy?
(na 5-6 fest głodnych ludzi)

  • 35-40 deko miynsa wołowego – nojlepszy jaki ziebro abo szponder

  • 35- 40 deko miynsa wieprzowego – jako kość ze schabu, karczek abo konsek zieber

  • 20- 30 deko miynsa drobiowego – to moge być kark z indyka, porcja rosołowo abo skrzidełka z kurczaka (Jak sie wto odchudzo, to niech do wiyncyj miynsa drobiowego, a mniyj z wieprzka, bo one je fest tłuste. Razym powinno tego być przinajmij kilo)

  • żołondki indycze abo z kurczaka
  • 1,5 – 2 l wody
  • pieprz w kulkach abo pomielony
  • 2 kulki angielskigo ziela
  • 1 mały liść laurowy abo pół wielkigo
  • 3 wielki marekwie abo 4-5 małych
  • 1/4 średnij wielkości selera
  • 1/3 pora ( jak je chruby, jak je taki fest lichy to wiyncyj)
  • 1 korzyń pietruszki
  • 1 cebula razym z szupom
  • 1 zmiażdżony zombek czosku razym z szupom
  • plaskato łyżyczka soli
  • nudle

Jak sie to warzy?   

  1. Do wielkigo garca wciepujymy miynso i zalywomy wodom. Wody musi być tela, żeby nom te całe miynso przikryło. Jak nie bydzie przikryte wodom, to sie nie uwarzy i nie bydzie zupy. Wciepujymy kulki ziela, liść laurowy i kulki pieprzu. Jak momy pieprz pomielony, to go jeszcze nie wciepujymy, bo to za pryndko. Warzymy to na małym ogniu przez godzina, niech se to tak pomału bulko. Jak sie zacznie robić tako bioło piana, to cza jom zebrać łyżkom do gorczka i wyloć, bo tej piany nom tam nie trza.

  2. Po godzinie wciepujymy wszystki te jarziny i warzymy to dalij. Dobro nudelzupa musi sie warzyć przinajmij 2,5 godziny – moge wiyncyj, ale nie moge mynij. Jak warzymy na miynsie kurczakowym, to je trza po godzinie wyciongnyć, bo nom sie rozwarzy i rozklekoce w tej nudelzupie.

  3. Na 10 minut przed podaniym łostatecznie doprawiomy nasza zupa – ciepiymy sól i pieprz jak momy taki mielony.

  4. Po zdjynciu z ognia trza se tyn bulion przeloć przez cedzitko, coby nom farfocle z miynsa i jarzin nie pływały po talyrzu.

  5. Nojlepszo do nudelzupy je domowo nudla, ale jak takij ni mocie, to moge być jako kupno. Nudle sie warzy w osobnym gorczku i miyszo z zupom przed podaniym.

  6. Po nalociu do talyrza sypiymy pietruszka, pokrote żołondki indycze abo kurczakowe i pokroto marchewka wyciongnyto z nudelzupy. Jak wto lubi, to se to moge doprawić magom, abo zamiast pietruszki ciepnyć trocha koperku.

fot. Iwona Łach
fot. Iwona Łach
  • 19.10.2014

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.