Tyn czwortek bydzie fest tusty. Bydymy ale maszkecić. 

Wtoś kiejsik pedzioł, że kiej sie w tyn dziyń niy zjy żodnego krepla, niy bydzie sie szczynśliwym. A szczyńściu trzeja pomóc, toż dzielymy sie z Wami swojskom recepturom na kreple, kiero my erbli, po takij fest ślonskij kucharce.

Co potrzeja?

50 dag mołki
5 dag drożdży
1 szklonka mlyka
6 żółtek
1 paczka cukru waniliowego
2 dag cukru
cukier puder
2 łyżki cukru
5 dag masła
3 kostki szmalcu abo liter łoleju
1 łyżka szpyrolu
20 dag marmulady
troszka soli

Wiela kalorii?

Lepij niy wiedzieć ;)

Bierymy sie do roboty

• Mlyko lekutko zagrzoć, rozrobić w nim drożdże, 2 dag cukru i 2 łyżki mołki. Łostawić do wyrośniyńcio.
• Żółtka utrzić z cukrym waniliowym i dwoma łyżkami cukru.
• Mołka przesioć do miski i wloć tyn roszczyn i te utrzone żółtka. Troszka posolić i dobrze wyrobić ciasto.
• Na koniec dodać 5 dag rozpuszczonego masła i łyżka szpyrytusu i jeszcze roz wyrobić i łodstawić do wyrośniyńcio.
• Rozwałkować ciasto ale coby było rube. Bo kiej bydzie ciyńki, to sie Wom wszyjstko rozlezie. Wykrować szklonkom kółka i dać na nich marmulady.
• Potym zaś fajnie ich zawinyć i ukulać w rynce. Trzeja se to dobrze polepić, bo potym Wom może ta marmulada uciyc.
• W miyndzy czasie rozgrzoć łolyj abo lepij smalec. Ale niy w za szyrokim gornku, lepij jak je głymboki. Powinny wlyź kaś ze 3 kostki smalcu abo z liter łoleju. Niy moze być abo za mało abo za dużo. Olyj musi być dobrze rozgrzony ale niy za fest.
• Wciepywać po pora tych krepli do tego łoleju i co jakiś czas, łobrócić na drugo strona.
• Kiej bydom już taki fajne, wyciongnyć na talyrz i abo złonaczyć lukier abo posuć cuktym pudrym.

Luker

• Jedna łopcja:
  Drzewianom pałkom wymiyszać jedno biołko z cukrym pudrym.
• Drugo łopcja:
  Cukier puder wsuć do miseczki, do tego dać łyżka wrzawej wody, abo łyżka mlyka i pałkom wymiyszać.
• Kiej luker wyńdzie fest twardy, to kapnyć jeszcze mlyka, abo wody.

A jak je u Wos? Kupujecie kreple abo robicie?

fot. gryfnie